[ad_1]
2hr30
Laklos sone,
Lekip reini,
Anfin libere,
Lazourne fini.
Mem traze toulezour,
Bann ti labitid.
Pou zwenn intel lor so sime retour,
Enn tifi bien timid.
Seki kone kone, pa rod konpran.
Tradision bizin respekte:
Enn pe pas call, pe fer galan,
Lot pe met koste pou fime.
Zom pa palab?
Les mwa riye!
Kisana kinn lager kout sez-latab?
Kisana kinn bour deor? Kisana kinn gagn zoure?
La, ki to pou kone!
Blok kat Kiss Me dan tabazi,
Lavi ser zordi, zafer-la inn vinn 1 Roupi!
Wai! Mo drese la? Pa tro vilin?
Zes lor zes! Enn bann zom pitin!
Rant lor baz,
Sakenn check so sakenn,
Group kase, enn bann al kal enn bataz,
Lot ena pou zwenn.
Zenes sa! Bizin deroule!
Misie-la pa konpran sa.
Lor lagar pa gagn kas enn poz, koze,
Kot pou ale, dan loka!?
Ala soz revini, li'nn fini fer so balad,
Li paret kontan,
Swa inn avoy lame, swa lalang inn fer salad.
Fini ariv kat-r-er, nou res enn er-d-tan.
Be Artir kote?
Wai, zordi li ena leson.
Pandan ki nou pe trene,
Ena pe met serye ar ledikasion.
Bon, inn ler pou bouze,
Yer, mo'nn rant lakaz dan nwar.
Bolom-bonnfam pre pou borde,
Zot pou gagn mwa gardien lagar.
Tousala, enn letan,
Bizin aksepte sanzman,
Pli divan nou bann zanfan,
Ki pou fer zistwar nou lafore koltar-siman.
(Lionel Lazwa, Gardien Lagar, 5 Fevriye 2020)
[ad_2]
Source
Have something to say? Leave a comment: